Academic literature on the topic 'Tungumálanám'

Í greininni er fjallað um sambýli íslensku og ensku eins og það birtist í málnotkun 92 framhaldsskólanema á samfélagsmiðlinum Facebook. Byggt er á greiningu á hlutverki málvíxla í stöðuuppfærslum (5.983 orð), athugasemdum (4.084 orð) og einkasamtölum (17.408 orð), það er að segja þegar gripið er til orða, orðasambanda, setninga og jafnvel lengri segða á ensku þar sem íslenska er annars grunnmálið, en slík víxl eru gjarnan talin vera eitt helsta einkenni unglingamáls. Í ljósi umræðu um vaxandi enskunotkun á tímum alþjóðavæðingar og örra tæknibreytinga, auk þess sem málvíxl eru talin eitt megineinkenna unglingamáls, kemur ef til vill á óvart að hlutfall ensku er einungis 3,02% af heildarorðaforðanum í gögnum okkar (831 orð af 27.475). Almennt eru málvíxl algengari í einkaspjalli en á sýnilegum vettvangi, það er í stöðuuppfærslum og athugasemdum, eins og við mátti búast, en meðaltölin segja þó ekki alla söguna. Hlutfall ensku sveiflast til að mynda frá 0,16% í samtali um skólaverkefni upp í 30,47% í ærslafullu spjalli um næturlíf, tónlist og myndbönd á Youtube. Þó er ekkert í gögnum okkar sem bendir til tvítyngdra málaðstæðna þar sem enska er notuð sem grunnmál samhliða íslensku. Meðal þess sem rannsókn okkar leiðir í ljós er að ungmennin nota ensku helst þegar þau virðist vanta orð á íslensku, í upphrópunum, til áhersluauka, í leikrænum tilgangi og til að styrkja tengsl sín á milli. Þessar niðurstöður eru í samræmi við það sem sambærilegar erlendar rannsóknir hafa leitt í ljós. Auk þess kemur enska gjarnan við sögu í þeim textum sem birtir eru með myndum í stöðuuppfærslum. Það sem síðan ræður mestu um hvort málvíxlum er beitt eru annars vegar málaðstæðurnar og hins vegar umræðuefnið. Á samtalsþráðunum er almennt meiri tilhneiging til að skipta yfir í ensku en það fer þó mjög mikið eftir umræðuefninu. Þegar rætt er um efni á borð við skóla eða almennar frístundir heyrir til undantekninga að gripið sé til ensku en þegar talið berst að tölvuleikjum, sjónvarpsþáttum og tilteknum sérhæfðum viðfangsefnum eru málvíxl býsna áberandi.

Markmið þessarar rannsóknar var að kanna viðhorf nokkurra tungumálakennara í framhaldsskólum til skapandi kennsluhátta. Skoðað var hvað það væri sem einkenndi helst skapandi kennsluhætti þessara kennara, hvort þeim fyndist mikilvægt að búa til tækifæri fyrir nemendur til að vera skapandi og hvers konar kennsluaðferðum þeir beittu helst. Einnig var athugað hvort eitthvað stæði í vegi fyrir því að þeir beittu skapandi kennsluaðferðum og hvað þá helst. Leitast er við að skilgreina hugtakið sköpun og fjallað er um sköpun í ljósi hugmynda fræðimannanna John Dewey, Lev Vygotsky, Elliot Eisner og Mihaly Csikszentmihalyi um nám og sköpun. Rannsóknin er hluti af rannsókninni Starfshættir í framhaldsskólum og byggist á sjö viðtölum og jafnmörgum vettvangsathugunum hjá tungumálakennurum úr þeirri rannsókn. Auk þess tók rannsakandi fjögur viðtöl til viðbótar og gerði tvær vettvangsathuganir.Helstu niðurstöður eru þær að flestum kennurunum finnst mikilvægt að hlúa að sköpun, sem er grunnþáttur í menntun á Íslandi, meðal annars vegna þess að skapandi aðferðir vekja áhuga, þær stuðla að auknu sjálfstrausti nemenda og gera þá betur í stakk búna til að takast á við verkefni sem bíða þeirra í framtíðinni. Nota þeir að sögn fjölbreyttar aðferðir sem gefa nemendum þeirra tækifæri til að vera skapandi. Hins vegar er ýmislegt sem stendur í vegi fyrir því að þeir noti slíkar aðferðir eins mikið og þeir vilja. Niðurstöður rannsóknarinnar benda til þess að til að koma til móts við aðalnámskrá varðandi sköpun í námi þurfi að efla skapandi nálgun í tungumálanámi í framhaldsskólum. Auka þarf sjálfstæði nemenda og svigrúm kennara til samstarfs, bæði innan deilda og milli deilda, auk þess sem hlúa þarf að menntun og endurmenntun kennara.